藝術作品是龍是蛇見仁見智，正所謂各花入各眼，從來冇乜標準可言。可能就係冇乜標準嘅關係，所以港產官僚好過癮o架，有時會將藝術作品標籤為不雅物品，好似譽滿全球嘅大衞像咁吖，刊登於英文報章《東快訊》之後，曾經被淫審處評為二級不雅。
雖然話藝術作品各花入各眼啫，不過呢個世界始終有一種人叫做藝術鑑賞家，有一種機構叫做拍賣行，有能力為藝術作品估出雖不中亦不遠嘅身價。功夫茶今日要講嘅係，西九文化區管理局有可能做咗冤大頭！
件事係咁嘅，有一個位於西九文化區嘅視覺藝術博物館叫做M+，預計二○一七年落成，管理局去年六月宣布以「部分捐贈、部分收購」嘅方式購入展覽品，向瑞士收藏家Uli Sigg取得一千五百件中國當代藝術品。根據管理局所講，其中一千四百六十三件藝術品係對方「捐贈」，聲稱估值十三億元，另外四十七件係「買入」，作價一億七千七百萬元，平均每件價值超過三百七十六萬元。
好嘞，問題，喺所謂半賣半送嘅情況之下，逾億元掃入千幾件貨，到底值唔值呢？本地著名油畫家，香港油畫研究會主席林鳴崗就質疑嘞，大部分購入嘅藝術品係近十至二十年嘅貨色，藝術家知名度較低，作品可能只係值幾十萬元o架咋。所以咯喎，林鳴崗斬釘截鐵咁話：「完全唔值一億七千幾萬，直情搵笨！」
雖然功夫茶唔係藝術鑑賞家，亦唔係經營拍賣行，不過一般嘅常識推理唔會唔曉囉。簡單咁講吖，如果一籃子藝術品全部都係價值不菲嘅，有乜可能買幾十件送千幾件？你試下去街市買餸吖，如果有個豬肉佬同你講，買一斤豬頸肉送一千斤五花腩，睇怕你會以為個豬肉佬賣嘅其實係來自內地奸商嘅黑心食品，所謂五花腩嘅原材料話唔定係死貓死狗。
所以林鳴崗批評得唔係冇道理o架，管理局購入相關藝術品之前又冇諮詢本地藝術團體，應該透過獨立鑑證機構以及專業人士估價先至決定大手入貨吖嘛。喂，大拿拿一億七千幾萬元公帑喎，冇理由瞇埋雙眼倒水咁倒啫，吓話！
立法會監察西九計劃聯合小組委員會主席鍾樹根都話呀，管理局同收藏家嘅交易有如「買嘢搭單促銷」，送贈千幾件藝術品好似清倉咁清，擔心有關安排係掩眼法。鍾樹根將於立法會提出質詢，要求委託獨立人士估價，並且提高選購程序嘅透明度，避免浪費公帑。
計功夫茶話齋，港產官僚浪費公帑都唔係第一次o架嘞，望只望當中不涉及刑事成分嘅利益輸送啦！