新一屆全國政協委員大執位，單睇香港特邀人士嗰份名單，就見到有近四十個舊人嘅位置換上新人。不過，所有位置安排或分配好唔簡單，而且經常有變，所以有關方面一日未公布結果，大家都係估估吓，唔可以作準。不過，聽聞有部分內地媒體一早就知道個政協名單內容，好早就主動接觸名單中人，游說對方畀錢落廣告宣傳，真係聞所未聞。
有位新任政協委員透露，佢喺幾個星期前向有關方面提交報名表，但竟然有啲內地媒體早於佢提交報名表前一個月，就已經同佢接觸，游說叫佢落廣告、寫吓評論，因為想做政協就開始要多啲人識佢喎。不過，當然唔係個個名單中人都會畀錢落廣告啦，但有唔少被呢啲內地媒體聯絡過嘅人，最後都真係做咗政協委員，係咪好神奇呢！
有人就笑言，唔知呢啲內地媒體係一早就知道份名單內容，定係大包圍投資，趁住五年一度嘅政協換屆搵番筆，好天斬埋落雨柴，究竟內裏有乜原因，相信好難搵到確實答案。