政情：廢腑之言：談國教出貓局長唔得掂

國民教育家長關注組日前出版新書，爆料指召集人陳惜姿喺反國教期間曾收到特首梁振英前私人助理鄭希暄電話，話代表西環約陳惜姿傾吓，適逢教育局局長吳克儉尋日約咗傳媒聚會，結果局長有備而來。吳克儉喺開場白講咗十五年免費教育等議題後，隨即主動回應有關國教風波，但就問傳媒佢可唔可以讀稿，然後煞有介事從衫袋中攞張貓紙出嚟照稿讀。正當大家以為有驚喜啦，殊不知答案竟然係佢同有關前政府僱員冇任何接觸，連邊個係「前政府僱員」都唔敢講清楚，真係答咗等於冇答，連張貓紙都嘥埋。