愛酒如命嘅前政務司司長唐英年，去年因為被揭九龍塘大宅僭建二千呎地庫而特首夢碎，當時仲傳聞地庫有個大酒窖儲存心愛珍釀。唔知係咪因為唐家大宅被屋宇署鑿到蓉蓉爛爛，連儲酒嘅心情都冇晒，唐唐最近一次過割愛八百一十支法國勃艮第（Burgundy）珍釀出嚟拍賣，批酒估值最少二千九百萬元。
《華爾街日報》早前有唐唐嘅報道，當然唔係講佢復出政壇啦，而係話唐唐突然搵人拍賣佢家中八百支勃艮第紅酒。唐唐接受該報訪問時話，因為家中藏酒實在太多，來自世界各地都有，收藏量夠佢飲幾世，要好好收藏咁多靚酒都需要時間同精力，所以現時要「揀擇」啲，唔係咩酒都擺喺屋企，先有拍賣佳釀呢個念頭。
負責操刀嘅拍賣行話，唐唐都好識時機放貨，因為法國最受歡迎嘅紅酒一向來自波爾多（Bordeaux），而勃艮第只係第二大產地，但係，自從亞洲區嘅豪客開始轉飲勃艮第貨後，波爾多紅酒價平均跌咗兩成，令勃艮第反而成為搶手貨，呢隻酒嘅價格仲被搶高咗好多添。
不過，幾千萬對唐唐真係濕濕碎，聽聞當年佢買紅酒從來唔係一箱箱買，而係一個個酒莊咁買。