政情：股壇長毛成日被點錯相
政府稱為保障個人私隱，限制公眾查閱公司董事完整身份證號碼，但前港交所董事、「股壇長毛」David Webb尋日出席一個午餐會時反駁，大家似乎將身份證號碼睇得太重，其實只係每人嘅另一個名，呢個「名」唔會同其他人撞。
David話，一早發現叫David Webb嘅並非佢一人專利，話說○七年有傳媒報道「股壇長毛售大屋，賺租又賺價」，雖然係叫David Webb，但賺大錢嘅唔係佢。David話，事實證明單憑名字識辨一個人真係唔夠，如果當日記者有核對身份證號碼，咁就唔使擺烏龍喇。
身份證號碼唔會認錯
名有相同，人亦有相似。話說去年長者生活津貼爭論令David Webb名氣喺網上更上一層樓，但有人見到David就覺得似曾相識好不安，原來係諗起美劇Heroes嘅奸角Sylar，令人不寒而慄。如果你冇呢個感覺，咁就恭喜你喇，唔使諗起劇中嘅血腥畫面。至於冇睇過Heroes嘅David就話，如果Sylar似佢，對方應慶幸喎！不過，佢話二人點似都好，一定唔會有同一個身份證號碼。