政情：葉劉做「奶媽」 威震行會
行政會議有十六個非官守議員，有人做咗好耐都冇人識，但亦有人做咗一陣就彈起。好似加入行會幾個月嘅新民黨立法會議員葉劉淑儀，就憑住建議限制奶粉出境搶得市民歡心，港大民意研究計劃最新民調顯示佢嘅評分係眾行會議員之首，睇怕「香港第一奶媽」呢個稱號，葉劉當之無愧。
港大一向有幫行會非官守議員做民調，對上一次已經係去年九月，當時葉劉都未入行會。估唔到喺最新一輪民調，葉劉第一炮已經榮升榜首，成為評分最高嘅議員，力壓行會召集人林煥光。林煥光出晒名人緣好，係政界嘅師奶殺手，但都被葉劉搶去榜首位置，只能屈居第二。睇嚟葉劉化身成「香港第一奶媽」後，真係幫到佢唔少。
奶粉問題一直困擾一班港媽，但班議員只識叫政府打擊水貨客，唯獨曾任貿易署嘅葉劉建議用行政措施，將奶粉定為戰略儲備品以限制出境，事後政府接納佢條橋後再改良，終於推出十招令港媽買到奶粉，令班港媽唔使擔心被「斷奶」。由於中國人普遍心態「有奶便是娘」，葉劉出招後即吸引到大批港媽粉絲，一啲都唔出奇。
遭《蘋果》老屈 林奮強攞同情分
至於排喺葉劉同林煥光之後嘅分別係羅范椒芬同民建聯李慧琼，結果並不意外，反而涉嫌「偷步賣樓」嘅行會成員林奮強排第五位高分就有啲意外。其實林奮強去年被爆出偷步賣樓事件後，已經甚少蒲頭，但咁都做到第五位受歡迎嘅行會成員，真係令人摸不着頭腦，唯一推斷係市民覺得上次《蘋果日報》老屈咗林奮強歧視新移民，所以增加咗唔少同情分。
知名度不足 林健鋒評分都冇
唔好以為好似葉劉咁遲啲入行會就着數，同葉劉齊齊獲委任做行會嘅商界林健鋒就影都唔見，連評分都冇。因為民調係先計算市民對行會成員嘅認知度，如果認知度太低，就唔使畀分。如果林健鋒要增加知名度，或者要學吓葉劉咁變身，或者做「奶爸」爭取多啲男士侍產假都未嘗不可。