中環出更：年宵頭陣 民記玩「剪布」

同日開檔嘅新民黨就似乎出師不利，皆因呢幾日天氣又暖又潮濕，但佢哋嘅招牌產品竟然係暖手枕，黨主席葉劉淑儀更着錯衫，喺猛烈陽光下着咗件紅噹噹嘅對胸棉衲，內襯黑色樽領長袖打底衫，卓妮見到都覺得熱，難得葉劉全程面不改容，額頭半滴汗都冇。

「皇仁仔」維園撐學弟

會計界議員梁繼昌同民主黨胡志偉等幾位「皇仁仔」，就到闊別維園廿年嘅皇仁書院檔口撐場，兩位相差六載嘅師兄弟笑言當年冇喺維園擺檔，只係擺麻雀檔同「搞亂檔」，但就一齊話當年最鍾意去喺正學校對面嘅維園跟隊踢波，兩位皇仁仔同維園都好有淵源。

民記以紅布代替傳統花球剪綵，眾人齊齊埋位「剪布」。（周依露攝）	新民黨副主席田北辰（圖）率領一眾男黨員全部着淺藍色唐裝衫。	梁繼昌（右）同胡志偉（左）兩個皇仁仔，寫揮春都要民主同人權。

另一邊廂，林健鋒、梁君彥等七名立法會議員就選址沙田開檔，應邀出席嘅內地及政制事務局局長譚志源亦買咗三百幾蚊賀年禮品，而為避免重蹈特首梁振英前日買富貴竹「走數」嘅覆轍，譚特地用iPhone計清楚總數，最後埋單四百蚊唔使找。買咗隻紫色孔雀風車嘅譚志源自爆紫色好旺佢，歷年三次升職都係打紫色呔見記者，唔知呢隻紫色風車會唔會助佢更上一層樓呢？

卓妮