國民教育家長關注組出版新書，披露佢哋嘅召集人陳惜姿喺反國民教育期間曾收到特首梁振英前私人助理鄭希暄（Scott）電話，電話中Scott話要代表中聯辦約陳惜姿傾傾。我哋當然想搵Scott問下佢有咩回應啦，不過兩日來，我哋打Scott嘅手提電話號碼，一係冇人聽，一係就轉駁去留言信箱。我哋又嘗試打去佢嘅辦公室搵佢，點知佢嘅同事都話唔見佢。莫非要登尋人啟事先搵到Scott？
相信呢兩日大家都好想搵Scott問下佢係咪真係有受中聯辦委託去搵陳惜姿，我哋打咗兩日電話都搵佢唔到，作為記者當然唔會咁易罷休。我哋知道Scott喺本港某大機構出任公關顧問工作，於是就打去佢嘅辦公室，點知就展開一場尋人奇遇記。
我哋首先打去該機構嘅傳媒專線，點知就好似打咗去啲客戶服務熱線咁，得電話錄音「招呼」我哋，後來我哋打畀該機構嘅公共關係主任，佢就話佢唔負責傳媒查詢。最後該機構嘅傳媒關係經理就再打嚟，話成日都未見過Scott，連佢放假定出去做嘢都唔知咁話。Scott對於咁古怪嘅指控全無反應，行蹤又咁神秘，唔通真係有啲嘢？