政情：公民講場：養牛救糧荒? 局長求良方

民望最高嘅局長，食物及衞生局局長高永文，近日連爆兩鋪大鑊。第一鋪係內地水貨客同個人遊旅客喺香港瘋狂搶購奶粉，令好多香港媽咪買唔到足夠奶粉餵BB。政府嗰頭推出十招「港人港奶」措施，唔夠兩日又爆出內地輸港活牛數量大減，令香港人唔夠新鮮牛肉食嘅問題，又係開正高永文嗰瓣。其實高永文大可諗下喺香港推動乳牛業，等牛奶同牛肉都自給自足，一次過解決晒兩個問題，不過大前提係要搵到足夠土地養草餵牛，可能又要填海、掘地同起人工島，並須解決滿地牛屎同牛屁污染等衞生同環保問題，要高永文同其他問責官員執手尾，都係諗唔過！