立法會負責審議樓市「雙辣招」嘅《 2012年印花稅（修訂）條例草案》委員會尋日開會，由於涉及樓宇買賣，有份審議嘅議員都成為驚弓之鳥，總之係唔係都申報咗先。十幾人輪流申報自己同「物業」有咩關係，令到會議單係搞申報程序，都已經用咗十五分鐘。
由於委員會主席李慧琼自己都講唔出條申報界線，所以班議員索性乜都申報一餐，自由黨田北俊就話自己從事地產生意，公民黨湯家驊話自己同地產商打過官司，而自由黨張宇人最玩嘢，話自己打算買賣物業，民主黨胡志偉甚至申報佢屋企人持有物業。最尾連李慧琼都要申報，話自己做緊間會計師行有份做物業買賣。
可能大家對呢條例特別緊張，連用字都突然過晒火位，地產及建造界石禮謙講到印花稅打擊樓市時，就爆咗一句「打擊到買家×街呀！」粗口都出埋，泛民同主席李慧琼都竟然無阻止，亦無裁決佢違規。似乎第日長毛喺議事堂講同一用語，都未必會被趕走。
自由黨就仲緊張，派出喺立法會選舉落敗嘅黨榮譽主席劉健儀喺公眾席上遙距控制田北俊，逢親田少發言，劉健儀即時以短訊發放資料畀田少做補充，都唔知邊個先至係議員。