政情：唔打私企工 母校講學 李明逵夠「高」
警隊咁多代前一哥，最正直嘅真係非「高佬」Dick Sir李明逵莫屬！點解咁講？佢退咗休打死都唔去私人機構打工，寧願做義工、教人烹飪同做吓評判咁，幾日前仲返咗佢母校中大，同前助理處長（刑事）吳家聲一齊教犯罪學，分享吓警隊管理經驗，唔似得其他前任一哥咁，一退咗休就去大機構做高層，或者全國政協，Dick Sir果然人如其高度，夠晒高！清高個高！
吳家聲亦執教鞭
久未露面嘅Dick Sir，仲係咁有型有款。個課程係社會學特選論題：犯罪與刑事司法，做咗客席助理教授嘅吳Sir請咗Dick Sir嚟演講一堂，喺名人效應下，七十個社會系碩士走晒去捧場，佢今次講「警察如何制訂策略打擊罪案」，做過一哥嘅佢簡直係駕輕就熟，講到警隊工作唔單止巡邏同查案咁簡單，都要搞埋警民同傳媒關係，又要講教育同點樣防止罪案。
嗰日佢仲同學生討論到超晒時，同老婆食飯都遲大到添，真係唔話得。至於另一個卸戎裝、執教鞭嘅吳Sir，退休之後同佢位歌手老婆曾路得遊完埠，就以博士身份返母校中大教犯罪學，又係一個打死唔打「銅臭工」嘅警官。