前政務司司長林瑞麟（林D9）現正身處英國醉心進修神學，不過有關佢會喺政圈捲土重來嘅消息從未停止，最近林D9嘅新動向再度炒熱，有傳佢會接替前律政司司長梁愛詩（詩姐），出任基本法委員會副主任，一切關鍵在於梁愛詩會否引退喎。
新一屆全國政協委員名單陸續喺親中圈子中流傳，焦點之一係多名前高官能否進身全國政協，其中被東方報業集團揭發貪盡海陸空嘅「貪曾」前特首曾蔭權爵士，最後果然榜上無名，前政務司司長唐英年、前警務處處長鄧竟成同前廉政專員湯顯明，則成功入圍，其中唐唐稍後仲預計會當選政協常委。
至於另一位傳過會出任全國政協甚至政協常委嘅林D9，名字就並無喺名單之上出現，不過有親中消息指，中央可能係另有安排，有更重要嘅任務要交付畀本身係大律師嘅林D9。
消息指出，林D9接替詩姐當基委會副主任嘅傳聞，早於去年年中開始流傳，一來係詩姐年事已高，任期又即將屆滿，二來係林D9出任政制及內地事務局局長多時，屢次披甲上陣推銷政改，對《基本法》十分熟悉，一旦詩姐引退，林D9絕對係合適繼任人選。須知基委會副主任職級等同全國人大常委，仲高過政協常委少少，林D9去年政府換屆時不獲續任政務司司長，依家睇番轉頭可能係焉知非福。