泛民主派處事最叻就係持雙重標準。最近公民黨（公文袋）同民主黨（白鴿黨）評論廉政公署立案調查特首梁振英（CY）同全國政協委員劉夢熊，涉嫌喺特首選舉中賄選嘅案件，就繼續大玩雙重標準，言行令人側目。
話說CY日前回應廉署立案調查嘅言論，係針對泛民係唔係都走去廉署報案，浪費執法機關嘅時間同資源，但係泛民就將CY番說話曲解為向廉署施壓，真係夾硬兼老屈。
其中公文袋黨魁梁家傑更加向傳媒表示：「佢（CY）較明智嘅做法係唔講好過講，因為佢始終係牽涉今次投訴嘅主角。」乜公文袋唔係一直要求CY公開向全港市民詳細交代事件、唔好藉廉署調查做擋箭牌嘅咩？希望當立法會稍後表決，係咪引用特權法調查劉夢熊事件的時候，梁家傑可以講得出，做得到，投下反對票，以免CY再講更多嘢。
至於白鴿黨仲離譜，曾經喺廉署做過嘅白鴿黨總幹事林卓廷，早兩日先話根據《陽光時務週刊》嘅專訪內容，「若梁振英是基於劉夢熊幫他助選，而答應委任公職（行政會議成員），或不涉及賄選」。
不過，尋日又有傳媒引述林卓廷話，CY咁嘅講法係「蔑視投訴內容的嚴重性，無視廉署獨立和專業執法工作，對廉署構成壓力」，真係乜都佢講晒。