政情：西九：改名係嚴肅事 戲曲中心企硬「私處」
「西九大戲棚」尋日開鑼，大會邀請西九管理局嘅高層同粵劇名伶、藝術家主持開幕禮。對於早前西九戲曲中心嘅英文譯名「Xiqu Centre」變「私處中心」嘅風波，西九管理局表演藝術行政總監茹國烈回應話，「戲曲」一詞係唔同地方都有唔同嘅譯法，希望學術界畀多啲意見。不過，佢重申改名係嚴肅事，現階段再討論只會繼續滲入社會氣氛，企硬話唔會貿貿然改名喎。
林鄭走「唐」唔收糖
至於尋日個開幕禮，政務司司長林鄭月娥以管理局董事局主席身份主禮，佢切完燒豬之後就參觀戲棚同市集。廿多個市集攤位售賣多款地道美食，仲有傳統及現代嘅手工藝品，林鄭就叫助手用三十元買咗一盒叉燒酥，之後再行到一間賣吹波糖嘅攤檔，老闆娘見高官光臨，即時示意送糖，但作為梁班子嘅林鄭就繼續「走糖（唐）」，婉拒咗老闆娘嘅心意，急急腳走過隔籬嘅紙藝攤檔。
紙藝攤檔老闆敏叔用咗十幾分鐘用張紙手撕咗「林鄭月娥」四個大字出來，林鄭見到都笑不攏嘴咁講咗句：「呢個冇得唔要」，就收咗件撕紙藝術品喇。一連三個星期嘅「西九大戲棚」活動共有十八場唔同嘅演出，當中六場免費，所以大家有買趁手喇。