政情：助理跳槽 哪吒喊驚
西貢區議員「哪吒」方國珊出名打得，但最近有個跟咗佢五年嘅助理，突然粒聲唔出走咗，原來去咗死對頭自由黨做地區幹事。哪吒話，呢位助理手持好多機密資料，包括居民聯絡電話，仲曾經有過佢屋企鎖匙添，但竟然冇一個月通知就突然不辭而別，過檔自由黨，真係好驚前助理會將資料唔知點用。哪吒尋日開訴苦大會，批評自由黨用銀彈政策挖角呢招，實在太冇政治道德。
涉事助理指跟足規矩
哪吒仲話，聽聞自由黨係特登用高薪挖角，然後再搵佢掉轉槍頭去參選硬撼佢。雖然哪吒大數呢位前助理多宗罪，但我哋問過呢名助理，又出現另一版本。原來呢位助理去年十一月已經遞辭職信，但拖拖拉拉到今年一月至正式離開，至於有冇跟足勞工法例走人，呢位助理就話自己跟足規矩，如果哪吒覺得佢有咩做錯，歡迎去勞工處告佢喎。
曾經五年賓主關係，點解要搞到咁惡劣呢？聽聞係呢位助理不滿哪吒自從立法會選舉落敗後，性情大變。不過，呢啲嘢到底係誰是誰非真係好難判斷。