政情：新民捉清「老鼠」民記頭痕
政黨政團之間經常收購合併，據聞由立法會議員葉劉淑儀領導嘅新民黨，眼見之前成功搵咗幾個現任區議員加盟後，又蠢蠢欲動四出向各方人士招手，就連泛民主派區議員都係考慮之列。不過，呢個做法就惹起建制派關注，特別係擁有最多區議員嘅民建聯（民記）最頭痕，佢哋擔心嘅唔係新民黨坐大，而係區議會成為建制天下後，「貓捉老鼠」效應自然失效，有機會令建制派內訌。
距離下屆區議會選舉尚有近三年時間，但各大政黨陸續展開選舉前期部署工作，其中新民黨可算最為積極四出搵人洽談加盟合作。有消息指，新民黨最近睇中某個有泛民背景嘅區議員，正展開前期游說工作，本來人哋有志於壯大實力無可厚非，最弊係新民黨呢個舉動觸動咗建制派神經，特別係當區區議會有可能成為建制天下，對於地區工作嘅再進一步拓展未必有利。
剷起泛民 憂減危機意識
究竟此話何解呢？有民記資深地區人士形容，地區工作就好似「貓捉老鼠」咁，要有老鼠先激發地區拓展工作，所以一旦將泛民連根拔起，佢哋嘅危機意識自然打咗折扣，留番啲老鼠先至有啲動力。另有資深地區人士更戲謔，泛民區議員喺部分區議會係稀有動物，甚至可以形容佢哋為受保護動物，認真係少一個就冇一個喎。
建制派呢番「貓捉老鼠論」認真意氣風發，一切只怪泛民唔爭氣，但積極四出搵人加盟嘅新民黨就一於好少理，該黨副主席田北辰話，搵人加入最重要係理念一致，又要睇吓人選對個別課題，好似釋法、全民退休保障等有乜睇法，至於會否搵有泛民背景嘅區議員加入，田北辰話要睇該名人士係咪同泛民政黨有實質關連喎。
話時話，政治從來就係良禽擇木而棲，唔知田北辰呢番比較鬆動嘅言論，會否反而更吸引一眾「飛來蜢」自動獻身加盟呢？民記因應新嘅政治生態又有乜新招應對呢？