中環出更：項明生跳探戈「電親」
啱啱去完南極及南美洲旅遊大半個月嘅Sony Computer Entertainment香港董事項明生（James），叉足電後又精力十足投入工作。James話，今次係佢首次踏足南極，見到成千上萬隻可愛嘅企鵝，又目睹極地冰山壯麗景色，認真不枉此行。講起旅程趣聞，首推喺阿根廷首都布宜諾斯艾利斯，佢因為一時好奇心起，即興學跳探戈舞（Tango），結果爭啲同洋妞舞伴過電添！
點解失驚無神要學探戈？原來已經去過南美洲多次嘅James，今次途經阿根廷欣賞咗兩場精彩嘅探戈表演，引起佢嘅好奇心，於是臨時加插學舞行程。佢參加當地一間已有逾百年歷史嘅探戈舞學校，由講解理論到落場學跳，歷時一個多小時，都只係收四十港元。佢話探戈嘅舞步好性感，腳要經常喺舞伴胯下捐來捐去，但佢就論盡到成日踩親舞伴隻腳，好尷尬。
跳舞老師仲教路，要同舞伴時刻保持眼神交流，結果James望多拍檔一陣，就有過電嘅感覺，怕醜到耳仔都紅埋。經此一役，佢先知探戈原來係情人與情人之間跳嘅舞，仲有，原來佢欣賞舞蹈嘅天分，高過跳舞天分好多囉！
南極太靚狂影相
講起受到全球暖化衝擊嘅南極，James感嘆冰山正在融化，為咗留住美麗一刻，佢狂影咗幾千張相，其中唔少係氹人歡喜嘅企鵝。佢話目睹企鵝社群中嘅壞分子，趁機偷走其他企鵝辛辛苦苦用嘴搬返嚟築巢嘅石頭，原來唔止人類有善惡之分嘅。
卓妮