開講都有話，水能載舟，亦能覆舟，可想而知水係幾咁威力無窮。水係萬物之源，同時又可以摧毀萬物，如果一條隧道滲水，你估會有乜嘢後果吖嗱？本報記者巡查發現，紅磡海底隧道出現多處疑似滲水痕迹！
滲水呢家嘢，真係可大可小o架。童話故事都有講啦，曾經有一個荷蘭少年見到堤壩滲水，佢用一隻手指塞住個窿，以免滲水擴大造成洪水氾濫，咁先至救番成條村咋。問題係，有冇人喺紅隧修補滲水嘅地方呢？若然日久失修，紅隧會唔會出現大災難o架？
冇耐前之嘛，日本山梨縣有一條隧道發生天花坍塌事件，導致車毀人亡，事後發現呢一條隧道居然長期缺乏維修。至於香港人熟悉嘅紅隧咯喎，功夫茶唔係好肯定負責監管嘅官老爺有冇做好定期維修工作囉。
為咗了解紅隧嘅滲水情況，本報記者聯同香港驗樓及結構診斷有限公司技術顧問賴達明，利用高清紅外線掃描儀遙距檢測隧道管壁，發現管道之內多處天花板銜接嘅位置都呈現藍色標示，意思係可能有滲水情況，其中一處疑似滲漏嘅裂縫長達一米。賴達明就話嘞，隧道滲水未必能夠從常規肉眼檢測察覺，必須定期用儀器詳細檢測。
喂，紅隧通車已經超過四十年，每日行車十二萬架次，一來年事已高，二來汽車廢氣以及空氣潮濕都有機會腐蝕建築材料，擔心紅隧出事唔係杞人憂天o架。你知啦，今時今日嘅香港乜嘢古靈精怪嘅事情都會發生，幾個月前之嘛，獅子山隧道都火燭啦，冇人敢寫包單話紅隧萬無一失。
除咗滲水之外，紅隧仲有天花石屎剝落現象，其中一處露出生銹鋼筋，望見都得人驚。香港理工大學土木及結構工程學系教授殷建華就話嘞，海底水壓大，如果發現隧道滲水，應該立即搵出原因，並且即時修補，否則長遠影響結構安全。
講開又講，紅隧如果唔係日日塞車塞到爆，每日車流唔係十二萬架次咁鬼多，會唔會紓緩老化趨勢呢？理論上係會嘅，所以功夫茶懇請特區政府高抬貴手，真係好好想辦法解決紅隧塞車問題。年紀大，機器壞，紅隧經過四十年歲月洗禮，官老爺都唔想搞到佢積勞成疾啩，更加唔想有乜差池累街坊，學似日本隧道咁車毀人亡就大吉利是啦！
睇番資料，原來紅隧當初嘅設計係每日車流七萬八千架次，家陣十二萬架次即係超載啦。嗯，既然一架車超載要抄牌，一條隧道超載應該點做呢？功夫茶建議，運輸及房屋局局長張炳良千方百計慎防滲水變災難，萬一有乜冬瓜豆腐，罰你終身停牌冇得再做官！