我哋早前報道過，大部分身兼立法會同區議會成員嘅「雙料」議員，表面上喺區議會同轄下委員會嘅出席率都相當唔錯，但實際上係因為佢哋故意減少加入委員會，少會開自然就少缺席。啱啱「升咗呢」做雙料議員嘅民主黨胡志偉，最近亦效法其他資深雙料議員，「減磅」退出兩個區議會小組，以免兩頭唔到岸甚至累到人哋流會。
民主黨喺立法會選舉大敗，輸剩六位議員，每名議員嘅平均工作量隨之大增，每人最少要加入六個立法會委員會，其中胡志偉更負責「重中之重」嘅房屋同發展事務，自然好難分身出席太多區議會會議。佢早前就決定「壯士斷臂」，中途退出黃大仙區議會轄下嘅政府及公用機構工程計劃工作小組同關注沙中線專責小組，但會繼續留守地區設施管理委員會同交通及運輸事務委員會。
胡志偉同我哋講，沙中線小組嘅工作已傾到尾聲，冇咩需要跟進，又強調自己喺地區咁耐，好多地區工程都好清楚，今次退會對佢影響唔大。其實民主黨青黃不接，有咁多個煲但就唔夠蓋，一個人身兼咁多職，要做得好，唔止要退會，仲要加把勁呀。