政情：唔使測謊機曾鈺成話議員都好老實
全國政協委員劉夢熊前日三度發聲明，話要同特首梁振英（CY）同時接受測謊機考驗，睇吓邊個講大話。立法會主席曾鈺成尋日出席一個辯論比賽時，被問及立法會是否需要買番部測謊機，測吓啲議員有冇講大話，佢就話立法會所有議員都講老實話，唔使測謊。至於CY同劉夢熊兩個人佢會信邊個，曾主席就話會信記者喎。
尋日嘅辯論題目係「一國兩制是保持香港繁榮穩定的最佳模式」，曾主席話，反方喺辯論時至少可以提出三種其他模式，例如一國一制、香港唔回歸，維持英國統治繼續做殖民地，或者中國人請英國人治港，即俗語所講嘅「中國做董事長，英國做總經理」。咁大逆不道？曾主席就話，梗係依家嘅一國兩制最適合香港啦。
喺評價雙方表現之餘，亦「私人醒」啲學生發言技巧，佢話如果啲人發言時距離個咪太近，就會令人聽得好辛苦，講嘢時不斷提高聲調亦唔代表有說服力，又話有議員同啲學生辯論員一樣，鍾意喺發言時愈講愈高音，搞到佢都不知幾擔心，驚有人總有一日會頂唔順，爆血管。