政情：局長夠鐘考廚藝
好多人都話梁振英（CY）政府上場後無蜜月期。雖然近半年針對CY個人兼政治化嘅不滿多不勝數，但反觀對政策嘅不滿相對較少。咁多位高官雖然身陷熱廚房，不過因為剛上任未有「實事」做，只要循規蹈矩，過去半年要成功生存都唔太難，雖然周圍都好熱，但都不失為一個蜜月期。不過隨着施政報告出台，各位政府中人亦夠鐘開工，係時候見真章。
回顧新政府上任半年，政治炸彈無錯係好多，但大多都係針對CY個人，而整個社會政治氣氛雖然熾熱，但由於真正有實事做嘅決策局唔多，只要唔好口出狂言亂講嘢、或者毫無政治意識自招火頭，廚房雖熱，一班高官都未至燒成火人。其實新政府上任後，除咗勞工及福利局推出過長者生活津貼遇拉布外，其他決策局都好似無咩政策上嘅困難要拆解。不過，隨住施政報告出台，CY被人質疑嘅誠信問題亦已燃燒得七七八八，呢個蜜月期亦同告終結。
遊行訴求漸具體
尋日泛民遊行某程度亦反映咗呢個轉向。尋日遊行人數雖然最多都只得二千人遊行，不過施政報告出台後，市民亦多咗樣嘢可以鬧，遊行訴求就由以往較政治化兼且虛無縹緲嘅指控，回到較具體嘅民生政策議題，尋日主辦單位亦預告，對民生政策嘅不滿將會係形成「倒梁第二波」。究竟呢股「第二波」倒梁浪潮會否成氣候，就要視乎一班高官係咪真係可以成功推出施政報告內容，並喺民怨形成之前降溫。
「少少」政綱待發揮
施政報告出台後，被指同CY競選政綱有落差，政府中人就話，今次特首選舉喺一場有競爭嘅選舉，而競選始終唔同施政，言語間似乎亦默認當初競選政綱難免講大咗啲。不過，經過半年調整醞釀，政府最終決定只將肯定喺近半年內做到嘅政策放入施政報告，雖然施政報告被指無驚喜，不過事實上施政報告雖則未有驚為天人嘅政策出台，但係總算每樣都做少少，各局長能否將每一瓣嘅「少少」好好發揮，從而脫穎而出，今次就要睇真功夫喇。