中環出更：馮詠儀今年主調綠色
呢幾日春回大地，尋日沙田馬場都呈現濃濃嘅初春氣息，事關某國際服裝品牌每年一度贊助盃賽，今年一改以往紫色主調，換上清新田園綠色。卓妮見到品牌董事總經理、利邦控股執行董事馮詠儀穿上墨綠色連身裙，與丈夫林詩棋拍住拖現身。近年唔少商家都將目光轉移中國及東南亞，馮詠儀卻透露，該公司今年將會主打歐美市場。
馮詠儀話，作為一個歷史悠久嘅國際品牌，長遠嚟講，鞏固歐美市場更為有利。今年服裝主調轉為綠色，馮詠儀話係因為品牌發源自板球球衣，而綠色就代表綠油油嘅球場。佢笑言，唔少人話內地人唔鍾意着綠色衫，但佢認為，依家內地客嘅眼光已經國際化，唔需要再刻意迎合佢哋嘅口味。
中港照相副主席兼行政總裁孫道弘（Stanley）同太太鍾婉琪、新世界發展執行董事兼聯席總經理鄭志剛、「蘭桂坊之父」盛智文夫婦、富商趙世光千金趙式和與丈夫李承康等政商名流都嚟湊熱鬧。Stanley與馬會董事利子厚（Michael）及周永健不約而同喺品牌櫃位選購領呔，Michael買完仲急不及待換上身添。