經常老作屈人嘅《蘋果日報》去年十月報道發展局局長陳茂波涉嫌醉酒駕駛，警方調查後話證據不足，前日律政司仲決定毋須採取進一步行動。「沉冤得雪」嘅陳茂波尋日出席電台節目後，被記者追問呢件事時，佢就眼濕濕強忍淚水話：「我已經深切反省，明白市民對官員操守有一定期望，我會保持警惕，飲酒後唔應該揸車，以後會更小心。」過程中都表現得幾屈委。
記者追問陳茂波，律政司係咪包庇？自己有冇錯？同埋會唔會道歉？佢就話冇補充。去年十月初，《蘋果日報》頭版報道陳茂波喺跑馬地馬會會所飲啤酒，之後揸車送家人返屋企，途中疑切雙白線，《蘋果》仲拍埋片放上網。不過，律政司話涉事錄像似乎曾被剪輯，警方亦搵唔到拍片人士提供進一步證據，律政司最終決定唔告陳茂波。有「沉冤得雪」嘅一日，難怪佢咁激動嘅。不過，亦有人發現陳茂波雙眼眼白好黃，而且又紅又多血絲，擔心係肝病嘅病徵，叫佢最好檢查吓喎。