政情：大仙好靈 龍年真亂龍
龍年政界風起雲湧，波譎雲詭，其實「有求必應」嘅黃大仙早已預示。東方報業集團喺去年初，曾就本港嘅政治、經濟、公共衞生同整體運勢，誠求黃大仙指引，結果大部分都求得中籤，唯獨係政治方面就求得下下籤，最後果然全年政治風波爆發不絕，臨近龍年尾聲，近日又爆出全國政協委員劉夢熊被廉政公署拘捕，以及疑似求官不遂而爆大鑊醜聞，揭露政界中人各懷鬼胎，見利忘義，實在令人心寒。
去年初在黃大仙祠，為本港政治求得嘅第四十三籤下下籤，籤文古人為「韓文公被貶」，籤文道：「只因直諫怒天顏，晝夜難離在馬鞍，主僕奔忙神亦倦，更加雪重擁南（藍）關」。當時有掌相堪輿命理學家解籤話，韓文公韓愈為官正直敢言，因上書直言進諫迎佛骨，而被貶廣東潮陽，最後一句所講嘅「雪重擁南（藍）關」籤文，正係記述韓愈喺貶謫途中所遇到嘅淒涼境況。
籤文啟示 社會多爭拗
咁呢支靈籤究竟有乜啟示呢？命理學家當時認為係暗示本港政治情況堪憂，港人敢言直諫，對不平事高聲疾呼，遇上不合理嘅施政，勢難逆來順受，必定力爭到底，社會上難免有較多爭拗，港人要喺困難重重嘅政治生態下掙扎求存。事實上，去年政界發生嘅風波一浪接一浪，最人神共憤嘅事件，就係東方報業集團獨家揭發嘅「貪曾」前特首曾蔭權爵士，喺任內貪盡海陸空嘅醜聞，將香港賴以成功嘅廉潔基石一手摧毀，令港人痛心疾首。
內耗不斷 新政府煩擾
其實貪曾醜聞被揭發前，已爆出特首候選人唐英年有婚外情同九龍塘約道大宅僭建地下王宮醜聞。梁振英當選特首後，又被揭佢自己間山頂大宅都有僭建地庫，誠信備受質疑，之後仲有前發展局局長麥齊光涉嫌詐騙房津下台、德育及國民教育風波、新任發展局局長陳茂波涉經營劏房事件、新界東北發展計劃爭議、長者生活津貼拉布戰、行政會議成員林奮強賣樓事件、以及最新鮮滾熱辣嘅劉夢熊事件等，總之就內耗不斷，新政府無日安寧過。
至於蛇年香港政治運程會係點？新政府能否轉危為機，專心施政？相信黃大仙好快就會有啟示。不過，因果報應，天理循環，好人有好報，壞人必定有惡報，若然未報，只係時辰未到啫。