中環出更：葉澍堃宴請青年才俊交流
馬場近期成為唔少名人嘅新蒲點，環境靚，私隱度又高，大家可以摸住酒杯底暢所欲言。出晒名好客嘅前高官葉澍堃（Stephen），早前就邀請一班青年才俊到跑馬地馬場聚會交流，仲趁機會飲番杯開心吓。不過，正當大家喺廂房興高采烈咁舉杯暢飲之際，Stephen突然有要事提早離開，最後將個場交由細仔葉瀚華（Ian）接力。
做過大律師、現職麥肯錫公司管理顧問嘅Ian，自細就跟爸爸Stephen出外應酬，見慣大場面，招呼客人又點會難倒佢吖！當晚Ian就同莎莎女婿陳振邦、香港青年聯會賢慧社主席羅詠詩及成員張詩培、廖創興家族後人廖偉芬及弟弟廖偉麟、菁英會成員陳錫銘、廠商會會董高偉國等老友打成一片，更與啤酒代理商葉振南大談品酒心得。
Ian哥哥葉瀚林剛於上月初成家立室，咁幾時輪到佢呢？Ian即笑言：「未有咁快！」卓妮相信佢現階段係想事業為重喇。