中環出更：容永祺擺80席 慶祝入行三十年
從事保險業界嘅香港專業及資深行政人員協會創會會長容永祺（Samuel），早前喺灣仔會展筵開八十圍慶祝入行三十年，與近千位友好共同見證人生歷史一刻。身兼全國政協委員嘅Samuel人緣廣，多位人大、政協及政商界人士紛紛到賀，仲請到好友國際著名男高音莫華倫（Warren）及歌星楊千嬅擔任表演嘉賓，巨星先後亮相，令晚宴氣氛高漲。
原來當晚楊千嬅係專程由北京趕返香港，高歌一曲後又急急返回北京繼續工作。咁畀面，全因Samuel係佢恩師，○五年時曾提名佢競選十大傑出青年。
勤運動繼續人生下半場
至於同Samuel相識近十年嘅Warren，就傾力獻唱一曲《O Sole Mio》，祝願對方前程錦繡。曾經學過三年聲樂嘅Samuel話，好崇拜Warren嘅歌藝，故每當對方有表演，佢都必定會買飛請晒一班老友去欣賞。
拚搏多年，Samuel話最開心憑住一股獅子山下精神，賺得人生幾桶金之外，更贏得大家無價嘅友誼。踏入人生下半場，Samuel希望喺家庭、事業、公職中取得平衡，仲要勤力運動keep fit，唔係邊有魄力做嘢呀？
Samuel喺英國讀心理學嘅愛女Tiffany，專登飛返香港賀爸爸，孖住哥哥Solomon做司儀，合拍到極，嘉賓一度以為佢哋係「情侶檔」添。法律系畢業嘅Solomon，去年投身保險業繼承爸爸衣鉢，短短半年間已升為壽險及財富管理高級經理，睇嚟Samuel大可以放心交棒喇。
卓妮