政情：鍾樹根鬧泛民「契弟」？
建制派大黨民建聯（民記）周不時都被泛民主派批評佢哋偏幫政府，話口未完，尋日泛民又喺立法會財務委員會鬧爆社區投資共享基金委任大批民記成員，擔心再注資兩億元會變成蛇齋餅糭基金，佢哋咁講，搞到全程都嬲爆爆嘅民記鍾樹根懷疑爆出「契弟」兩個字鬧泛民。
兩派激辯投資共享基金
話說公文袋郭家麒喺會議上批評政府將納稅人公帑做晒「買票獎券基金」，資助建制派喺地區買票，變成「蛇齋餅糭基金」。有多年區議會經驗嘅鍾樹根睇唔過眼，即時大叫：「條友亂嚟o架！咁講嘢都得嘅？」郭家麒就寸嘴話：「有人心虛啫！」
民記主席譚耀宗就反駁，話該黨一直冇提名成員加入基金，亦都冇申請任何基金內嘅項目，叫啲泛民議員唔好歧視同抹黑該黨成員。泛民鬧得咁激烈，大家好自然以為佢哋會投棄權票甚至反對票，但最終除咗人民力量等五個泛民議員投反對票之外，其他泛民突然反高潮投晒贊成票，令撥款以大比數通過。
睇到泛民又要威又要戴頭盔，有人就聽到鍾樹根即時爆出疑似「契弟」或「混吉」兩個字。不過，佢之後就澄清話當時只係講過泛民「冇腰骨」，又話自己從來都唔講粗口，希望外界唔好誤會佢喎。