中環出更：林鄭買揮春谷「桃花」
好多學生都鍾意夾錢投個年宵攤位試吓做生意嘅滋味，但各大年宵未開鑼，尋日已有一班中學生率先開檔，仲獲政務司司長林鄭月娥幫襯。同學仔見高官駕到，紛紛各出奇招拉客，仲有同學仔度身訂造一隻寫住林鄭英文名嘅手鈪搶客。
林鄭尋日滿載而歸，單係揮春就買咗四張，但揮春花款太多，搞到佢花多眼亂，呢頭拎起張「順順利利」揮春，望兩望就放番低，之後就揀咗張「大吉大利」，仲買多張「桃花旺盛」添。有同學仔諗出用百潔布變身做揮春，「揮春」擺完可以用嚟洗碗，雖然環保，但無論同學點落嘴頭都吸引唔到林鄭埋去幫襯。
問「商業機密」食檸檬
世事弄人，呢邊廂有同學仔失望而回，那邊廂就有同學請林鄭食檸檬。話說林鄭問同學去邊度入貨時，對方竟然話係商業機密拒絕透露喎，真係有潛質做官，但就搞到林鄭有啲尷尬。最後林鄭使咗四百幾蚊，臨走被問到特首梁振英使唔使再就日前全國政協委員劉夢熊嘅爆料內容解釋時，林鄭就兩手一伸聳聳肩不作回應。