政情：陳恒鑌抽籤踢走方剛
香港雖然話大唔大，話細唔細，但議題都可以多到講幾日都講唔晒，唔知係咪啲立法會議員冇創意，大家提出嘅動議辯論經常都大同小異，今次竟然仲鬧雙胞。下個月六日嘅大會，民建聯陳恒鑌（Ben）同自由黨方剛抽籤得到提出動議辯論，不過佢哋就不約而同都係講大嶼山嘅發展建設，真係撞到正一正。查實阿Ben動議嘅題目不嬲都只係講東涌建設，係今次先至改為講大嶼山，唔通佢收到風知施政報告會講發展大嶼山，所以特登改題目？
改議題後即刻抽中
逢星期三立法會大會都會有兩名議員獲編配提動議辯論，想提動議嘅議員太多，就要抽籤決定。阿Ben已經抽籤落空六次，方剛都有五次唔中籤o架喇。佢哋兩個終於都成功抽到喺下個月六日提動議辯論，點知阿Ben講「建設新北大嶼山」，而方剛就講「發展大嶼山」，大家嘅題目撞到正。雖然議員成日都口水多過茶，但冇理由用雙倍時間講同一樣嘢o架？聞說秘書處就建議抽到排後面嘅方剛改題目。
之不過係咪真係事有巧合呢？查實阿Ben喺去年十一月已經開始抽籤提動議辯論，但當時嘅題目係「建設宜居東涌」，不過就抽極都抽唔中，十二月中仲撤回咗添。佢早排先再拎番出嚟，但就改咗個題目為「建設新北大嶼山」，同施政報告中提出嘅「發展大嶼山」不謀而合，仲即刻抽中咗添，奈何一直都冇變過題目嘅方剛咁就畀人成功搶閘。建制派今個月初同特首梁振英食飯，莫非係民記收到風，通知阿Ben改題目？
無回答係咪收到風
阿Ben就當然話唔係喇，佢話不嬲都有同東涌嘅地區人士、區議員等傾偈，大家都覺得成個大嶼山都要發展，尤其係北大嶼山，所以民記嘅地區同事就話不如將個題目拉闊啲，唔止淨係講東涌，等議員可以發表多啲唔同意見。至於係咪收到風，佢就話︰「呢個唔係原因」，仲話「我由頭到尾都做緊，打咩尖！」
埋門畀人搶閘嘅方剛就慨嘆︰「咁多次都抽唔到，依家就同民建聯撞到正，佢（Ben）抽到喺我前面，要搶都冇辦法，惟有認命。」方剛「拓展」地區議題失敗，佢就話惟有關注番業界，講番零售業舖租飆升問題。