政情：梁福元發爛渣炮轟政府
十八鄉鄉事委員會主席梁福元近年經常被指霸佔官地，被拆完餐館又被拆荔枝山莊。尋日鄉議局執委會會議提到漁農工商旅遊委員會嘅工作，有份營運大棠荔枝山莊嘅梁福元就疑似趁機發爛渣，鬧爆政府冇心推廣休閒農業，仲質疑漁農自然護理署最新出版嘅休閒農場指南入面，有啲農莊唔知係咪合法。
指冇心推廣休閒農場
身兼委員會主任委員嘅大埔鄉事委員會主席文春輝見到梁福元咁o架，就反建議休閒農業嘅事交番畀梁福元負責嘅政策委員會探討。其實漁護署本新書設計都幾精美，列出一百二十間休閒農場，當中亦有介紹大棠荔枝山莊。
另外，沙田鄉事委員會主席莫錦貴尋日亦就新界村屋僭建問題提出臨時動議，譴責屯門鄉事委員會主席何君堯，批評佢早前曾向傳媒稱鄉議局「誘騙」村民申報，以及建議鄉議局協助「被誤導」嘅村民重新申報。由於何君堯尋日並唔在場，所以係咪譴責佢就要留待下次會議討論喇。