政情：沈祖堯自身經歷教國教 曾經否定中國
國民教育嘅爭議過去，但不時仍有人攞支港英旗出嚟揮舞。中文大學校長沈祖堯以自身教國教，佢話自己喺皇仁書院畢業，校徽上有皇冠，喺港大畢業時，對中國內地嘅認識近乎零，就算之後爸爸帶佢返上海省親同到蘇州旅遊，船上嘅種種不堪，令佢覺得自己唔屬於呢個地方，亦唔屬於呢個國家。
睇奧運受感動
轉捩點係喺八八年嘅漢城奧運會，喺中國隊勇奪乒乓球金牌後，佢差點流淚；到○八年北京奧運，見到中國金牌運動員鄒市明圍上中國國旗話：「我們不再是東亞病夫了。」佢嘅淚水奪眶而出，為自己係中國人感到自豪。而喺同年汶川大地震，目睹災後創傷症候群嘅受害者，佢更深深感受到血濃於水嘅苦難。
前年沈祖堯同爸爸返上海，重遊阿爺曾經擁有嘅飯店。沈爸爸同佢講，呢度就係佢小時候玩耍嘅地方，佢爸爸紅晒眼，這一刻令沈祖堯明白乜嘢叫做落葉歸根。當佢舊年睇到港人同內地遊客喺上水港鐵站打架同爭拗，佢嘅心向下沉。沈祖堯慨嘆，因為我哋嘅眼睛、頭髮、生活模式、對食物嘅偏好、對音樂、對文化的情懷，「我不能，也不會，否認我是中國人。」