政情:普選聯爛攤謀「活化」

最初由十三個泛民團體組成嘅終極普選聯盟(普選聯)經過二○一○年政改之後,佢哋嘅成員已經退嘅退,散嘅散。聞說佢哋會喺今個月舉行會員大會,不過就唔係商討未來大計,而係傾吓係咪應該將普選聯摺埋,又或者好似啲欠薪酒樓咁,改頭換面再開張。不過,普選聯成員之一嘅民主黨(白鴿黨)同大家意見有好大分歧,依家要大家坐番埋一齊,成數有幾高真係唔知喇。

據聞普選聯喺今個月廿三日會舉行會員大會傾吓未來嘅路向,包括點樣處理未來嘅政改,同埋睇吓點樣可以招攬多啲泛民黨派入嚟,提高認受性。不過當初白鴿黨願意談判,已經畀人怒轟佢哋出賣民主,直到舊年嘅立法會選舉,佢哋當初呢一步都仍然仲係對手攻擊嘅目標。白鴿黨肯喺政改談判中妥協呢一役,令到普選聯成為一個爛攤子,仲有邊個肯埋堆吖?咪惟有嚟緊開個會,諗一諗究竟將普選聯嚟個活化大翻新,定係索性摺埋佢算囉。

換名招攬新人

如果普選聯摺埋,當然係最乾手淨腳嘅方法啦,不過人又點會咁易心息呢?所以有人就提議不如換個名,再招攬其他泛民黨派入嚟啦。之不過,凡事唔係你肯張開懷抱,人哋就會投懷送抱嘅。曾經都係普選聯成員嘅街工當年就因為路線唔同而退出普選聯,而職工盟李卓人當年雖然冇退出普選聯,但最後立法會就政改方案投票時就投反對票,況且依家人哋已另組工黨,可謂今時唔同往日。而當年公民黨策動「五區公投」,同普選聯可以話一直都各行各路,睇怕要埋堆都要搵番個冠冕堂皇嘅理由先可以服眾。

學者未必回巢

咪話泛民各個政團可能各懷鬼胎,就算係曾熱心參與普選聯事務嘅一眾學者亦未必肯回巢。唔少學者當初都係本着為爭取民主出力而加入普選聯,但最後嘅收場竟然係畀人鬧賣港,猶如癡心錯付,所以依家都心灰意冷。咁嘅形勢之下,普選聯係咪真係可以好似啲酒樓咁,執笠換個名就可以再開業呢?

第一手消息請下載on.cc東方互動iPhone/iPad/Android/Windows Phone Apps