政情：鍾國斌帶隊緬甸起廠
近十年好多內地港商都將生產廠房轉移到柬埔寨、越南等地，貪該等地區人工平，但隨住當地經濟起飛，呢支歌仔已經冇得再唱。本身做製衣起家嘅立法會紡織及製衣界議員鍾國斌（Felix）話，本月底會帶六十名廠家去緬甸搵地起工廠，因為喺緬甸請一個工人超平，人工大概係東莞嘅五分之一咋。
Felix表示，自從緬甸局勢轉趨穩定後，一直想喺當地設廠，最近仲有直航機來回兩地，非常方便。所以月尾佢會同紡織界行家飛去緬甸，傾吓喺仰光附近設立港商工業區，規模都唔細，預計投資額達六十億港元，佔地足足九百個足球場咁大。今次幾間大廠都會跟埋去，例如唐英年家族間半島針織。雖然緬甸人工平、稅率低，但Felix都擔心當地有貪污出現。
講開紡織業，Felix話如果要工業回流香港，唔係唔得，因為本地有大量空置工廠，只係人手不足，所以佢建議政府為釋囚提供就業渠道，安排佢哋去工廠打工，等佢哋喺獄中學曉嘅一門手藝不至白費喎。