政情：從未忘記結婚日 林健鋒寸爆蔣麗芸
民建聯立法會議員蔣麗芸（Ann）日前為咗力挺行政長官梁振英（CY），不惜自爆老公都唔記得結婚紀念日，特首係大忙人，記錯少少有咩出奇喎。雖然阿Ann咁諗，但行政會議成員林健鋒（Jeffrey）尋日就有另類睇法，佢話咁多年都記得結婚紀念日係一月十一日，因為三條一夠晒易記，除咗寸到阿Ann應一應，佢係咪仲想暗示CY唔抵幫呢？
年年都有慶祝
咁啱尋日就係一月十一日，今次Jeffrey抽水真係抽得好合時。佢話結婚三十五年，每年嘅紀念日都盡可能放低工作，抽時間喺晏晝或夜晚同老婆慶祝，所以從來未試過唔記得結婚紀念日，尋日佢仲專登搵埋張啱啱結婚嘅相片畀記者睇，以前個樣同依家差好遠，唔講都唔知道係佢。
Jeffrey又話，尋晚同老婆食飯慶祝，仲專登叫埋囝囝林凱章，唔怕阻住兩公婆撐枱腳咩？原來阿仔另有任務，就係負責向老婆大人送花。至於食咩菜、送咩花，Jeffrey就大賣關子，話總之一定係老婆鍾意就得喇。