政情：醫療衞生少是非 高永文民望高有理
新一屆政府問責班子成員，民望評分差天共地，發展局局長陳茂波同教育局局長吳克儉民望長期插水，但同樣係新入「熱廚房」嘅食物及衞生局局長高永文，即使上任初期曾被揭發寓所僭建，民望依然持續高企。高永文尋日接受電台節目訪問時對此唔敢認叻，話會視高民望係鞭策，又認為自己民望較高，主因係專責醫療衞生等民生政策，毋須好似其他團隊成員要處理啲政治敏感及意識形態嘅議題。
高永文又提到今年係沙士襲港十周年，憶起當年時任衞生福利及食物局局長楊永強同醫管局主席梁智鴻，先後為當局處理沙士不力引咎辭職後，時任醫管局署理行政總監嘅佢亦主動請辭。高永文話，兩人當年都並非因為過失而下台，辭職純粹係為咗體現問責精神喎，佢好「榮幸」可以跟隨兩人一同離開。如果新政府將來有高層官員問責下台時，唔知高永文到時又會唔會共同進退呢？