政情：惡搞海報 公記騰雞
政府尋日刊憲公布沙田區議會田心選區補選定於三月舉行，以填補民建聯（民記）劉江華加入政府而辭職出現嘅議席空缺。雖然呢區一直都係公民力量（公記）嘅地盤，但有傳民記想將呢區據為己有，咁啱最近網上流傳一張民記成員嘅參選宣傳海報。不過，民記方面就誓神劈願話絕無參選意圖，只係有議員助理惡搞海報「玩吓」，但累到建制派爆出內訌疑雲，仲玩到公記有得震冇得瞓。
前年沙田區議會選舉，競逐連任田心選區嘅潘國山話要專心完成博士論文，所以臨時臨急退選讓路畀劉江華參選，為出戰其後嘅立法會超級區議會鋪路。不過，由於劉江華落選超級議席，上月又加入政府做政制及內地事務局副局長，因而要辭去區議員職務，而補選將於下周五起至本月底接受提名，三月十號投票。過去一段時間，一直都係話劉江華會還番個議席畀公記，但最近卻忽然傳出民記計劃有變。
有傳民記想「一借冇回頭」，將田心選區議席據為己有，喺呢個時候，網上就流傳一張海報，印有前年區選代表民記參選沙田市中心選區嘅曾錦銓張相，亦寫有「沙田區議會田心區補選候選人」、「劉江華全力支持」等字句，又話「只許敗，不許勝，請你支持」等語句，難免令人聯想到民記想派人搶議席嘅傳聞。曾錦銓目前係民記新界東立法會議員陳克勤嘅助理，所以絕對有理由懷疑民記派佢出選。
潘話參選等公記決定
一張小小嘅海報，卻嚇得公記騰騰震。事關公記原本已受到劉江華對選民「用完即棄」嘅負面影響，同時又要面對泛民主派嘅挑戰，如果民記又派人搶票，到時大家真係攬住一鑊熟，所以公記諗咗個幾月，都未決定係咪派番啱啱完成博士論文嘅潘國山再度參選。潘國山承認，係咪參選仲要等公記決定，又強調冇欺騙過選民，當時真係兼顧唔到論文同區議會工作先退選，亦諗唔到之後會有補選喎。
民記認有人貪玩
不過，民記主席譚耀宗就話，冇聽過該黨會派人出選田心選區。而陳克勤亦誓神劈願話，田心議席係公記嘅，所以民記一定唔會搶，承認今次風波係佢助理貪玩之過喎。