政情：黃傑龍幫手扶貧
今屆政府決心要解決貧窮問題，重新設立扶貧委員會做實事，上個月開第一次會已經討論設立貧窮線。委員會主席、政務司司長林鄭月娥仲設咗六個專責小組負責唔同範疇，請咗扶貧委員會之外嘅其他相關人士加入做增補委員提供意見。
據聞六個小組已陸續成形，好多委員同增補委員都已經收到委任信，敍福樓集團執行董事黃傑龍（Simon）就事先張揚，話已經接受邀請，加入咗教育、就業和培訓專責小組喇。
指職位錯配嚴重
Simon話之前勞工及福利局有位官員游說佢入小組幫手扶貧，佢覺得依家飲食業經常有工無人做、有人無工做，請個洗碗出到成萬蚊都無人做，但又有好多人話窮要攞綜援，認為職位錯配嚴重，覺得作為業界可以睇吓有咩幫到手，所以就好樂意加入小組，「就業同培訓係可以互相配合，扶貧嘅目標係幫人脫貧，有工做先可以脫貧o架！」
佢又話上個禮拜收到封委任信，任期大約兩年，佢入嗰個小組除咗七個係扶委會委員之外，另外仲有十二個係增補委員，可以見到好多人都好關注扶貧問題喎。相信有關人選會喺施政報告前後公布。