政情：福建幫能量係咁升
「福建幫」近年致力全方位參政議政，呢塊孕育人才嘅土壤陸續取得成果，事關剛過去嘅港區全國人大代表換屆選舉，三十六名新當選嘅港區人大中，「福建幫」由原先只有兩人增加至多達八人，單計升幅有四倍之多，加上近年官場同議事堂嘅「福建幫」人數有增無減，佢哋呢股政治能量不斷上升，認真唔可以睇小。
港區人大換屆選舉早前落幕，三十六名新當選港區人大嘅得票多寡同排名固然可堪玩味，不過其實各大政治勢力嘅更迭更值得留意，因為倘以政黨背景劃分，「萬人黨」民建聯（民記）再度蟬聯港區人大「大戶」，粗略計算至少有七、八人係民記成員，包括新當選嘅新界社團聯會理事長陳勇、中華出入口商會副會長張明敏等。
活躍政圈有迹可尋
不過要數今次選舉嘅真正大贏家，必定係近年多元化發展嘅「福建幫」，事關五年前嘅人大選舉，有科技大學副校長黃玉山同東區區議員蔡素玉二人成功入局，今年竟然翻兩番由二變八，工商專聯主席黃友嘉、香港島各界聯合會理事長蔡毅、南旋集團主席王庭聰等都循不同渠道成功出線，加上部分同福建有特殊淵源嘅當選人，同「福建幫」有關連嘅甚至多達十人，相反「山東幫」未有因梁振英做特首而受惠，據知依家新當選嘅港區人大中，中聯辦社工部部長張鐵夫祖籍山東，不過相信稍為熟悉政治嘅人都知道，張鐵夫嘅當選同梁振英未必有特別關連。
事實上，「福建幫」中人近年喺政圈漸趨活躍亦有迹可尋，較為著名嘅係○八年開始獲委任做民政事務局副局長嘅許曉暉，以及最近獲委任做教育局政治助理嘅十優狀元施俊輝，至於喺立法會方面，民建聯陳克勤同金融服務界張華峰都係閩籍中人嘅表表者，如果計埋十八區閩籍區議員更加係多不勝數，「福建幫」呢次連人大呢個國家最高權力機關都大有進帳，唔知下一個目標係唔係想有個福建人做特首呢？