中環出更：歎滿漢全席林健鋒意猶未盡
滿漢全席係中國近代飲食文化史中，最有代表性嘅宴饗，每道佳餚都係搜羅中國各地嘅山珍海錯，經由廚師巧奪天工嘅廚藝精製而成。行政會議成員林健鋒（Jeffrey）早前去東北吉林開會，就乘機造訪當地以滿漢全席馳名嘅餐廳，一嘗滿漢全席滋味，仲話食過翻尋味添，要食第二次至得喎。
吉林餐廳食簡易版
Jeffrey話當地呢間餐廳非常出名，因為老闆娘係清朝正黃旗後人，絕對係正宗滿州人，咁多年都以弘揚滿漢全席為宗旨，不過佢話如果食正宗版滿漢全席，要食百幾道菜，食足三日三夜，Jeffrey擔心頂唔順，而且又無咁多時間，所以只係搵晚食咗個簡易版就算，但佢估唔到簡易版都有成三十道菜。
究竟滿漢全席有咩食，唔通食「猴子腦」同「熊掌」？Jeffrey話呢啲統統都無，因為全部係受保護動物，現代版滿漢全席係着重刀工、調味多過食材，所以每道菜都好好食，但究竟係乜嘢食材，有啲連佢都唔知。佢只係話今次時間唔夠，下次一定要搵埋老婆去食足三日三夜過口癮。
