中環出更：陳維安獨臂迎訪客
本港六大慈善團體每年都到訪立法會。立法會主席曾鈺成與廿多位議員一如以往，尋日於百忙之中跟慈善團體嘅領導層交流意見。不過最令人注目嘅竟然係立法會秘書長陳維安（Kenneth）。大家見佢左手受傷包紮咗，到底發生咩事？
原來Kenneth早前同家人喺新西蘭度假，於行程結束前一日到訪皇后鎮，學玩靠人體重心驅動嘅兩輪車Segway，點知剛上車行咗幾步，甫落斜路即連人帶車失去平衡。Kenneth話見到左手腫如豬蹄，都心知大事不妙，返港求醫經診斷發現左手腕骨爆裂，除咗要打石膏六個星期，更要用兩口釘嚟固定患處，估計要兩至三個月至可以完全康復。
Kenneth話左手受傷，單靠右手仲可以勉強應付日常生活，所以無諗過要告病假。不過最令佢苦惱嘅係無法單手打領呔，話現正物色小學生常用嘅橡筋式領呔嚟「頂住先」。
陳文綺慧搵「行家」交流
至於今次造訪立法會嘅一眾慈善團體董事局成員，有部分人曾經多次光臨，例如東華主席陳文綺慧就嚟過幾次，佢哋嘅善舉議員無分派別都表示支持。不過有鑑於行家之間嘅交流唔多，今次佢就趁機聯繫其餘五大慈善團體，計劃遲啲開一個座談會，講下大家喺唔同範疇所發揮嘅作用以互相協調咁話。而保良局總理紀寬樂今次就係首次隨同保良局到訪立法會。佢話以前嘅立法會議員，身份非常尊貴，警員見到都要行敬禮。雖然現時立法會議員嘅地位依舊崇高，但係隨着時代嘅轉變，議會文化唔同咗，一切都不能同日而語嘞。
卓妮