元旦日遊行當晚，中環再次因為示威者堵塞馬路而癱瘓，無論係返屋企嘅市民同揸夜更嘅的士司機，都鬧爆示威者。我哋尋日喺警察討論區，見到一位自稱係女警嘅網民披露當晚心聲，當晚負責守中環嘅佢，話見證住六、七位後生仔不停挑釁差人，又用閃光燈照人隻眼，又預謀屈差人，話目擊呢啲事真令佢心痛。
該位「女警」剖白話，自從班V煞衝出馬路後，有六、七個廿幾歲嘅後生仔一直笑警察捉唔到佢哋，仲有人建議用閃光燈照班警察，照完又覺得無癮，就話不如去霸其他馬路。個「女警」仲話見到有示威者預謀屈警察打人，特意仆落地下，然後叫記者埋去影相，話唔明白點解香港市民變成咁喎。
公道啲講，其實當晚留守中環嘅示威者最少幾千人，大部分都係守秩序嘅，搞事分子一定有，不過如果挑釁警察，就確係違背咗遊行嘅原意囉。