發動元旦倒梁遊行嘅民間人權陣線，繼被踢爆就遊行人數「講大話」、「報大數」之後，尋日又被揭對不交十元稅行動「敢講唔敢做」。話說民陣尋日發表聲明，不滿特首梁振英遲遲唔回應上街市民訴求，迫使民間要用更多方式向政府施壓，其中由「保衞香港自由聯盟」發起嘅「罷交十元稅」不合作運動，民陣形容係前所未有，值得支持，並邀請市民一同加入。
民陣成員包括多個泛民黨派，民陣成日批評政府唔做諮詢，今次佢哋發稿表態力撐罷交十元稅，斷估無理由無諮詢過有關黨派啩？咁多個泛民黨派，十幾二十個泛民立法會議員，當中包括多名資深大律師同律師齊齊犯法，個個交少十蚊稅等稅局檢控，的確係前所未有，夠晒震撼喎！
不過，當我哋逐個查詢有關黨派，本身係資深大律師嘅公民黨黨魁梁家傑，就斬釘截鐵咁話該黨從來都唔會做啲犯法嘅事。工黨就話成件事係無中生有。民主黨主席劉慧卿就最離譜，話該黨支持罷交運動，但佢本人就已經交咗稅嘞，仲話支持唔代表本身一定要參與喎。唔知將來有市民罷交十元稅，班泛民議員會唔會仆出嚟幫佢哋打官司呢？