救人街坊慘睹「隻腳爛晒」
【本報訊】「大家好齊心！真係好感動！」號召街坊合力抬車救人的水電工程公司姓李東主，對於成功救人感到好開心，好感動，情緒久久未能平復，他認為今次事件證明香港人有愛心，亦發揮守望相助精神，但當他目睹捱撞婦人「隻腳爛晒」，心中忐忑不安，希望她早日康復。
李先生於車禍現場卅米外經營水電工程公司，當時他在公司內工作，突聽聞一聲巨響，立即走出店外查看，發現大批途人圍着受傷婦人，有人大叫肇事司機退後、有人嘗試將車推開、亦有人企圖將婦人拉出，但均不成功，有人恐愈幫愈忙大叫，「唔好亂咁郁佢（受傷婦人）呀！」
水電工程東主一呼百應
李不停聽到婦人慘叫，心急如焚，遂大叫「幫手抬車救人啦！」結果一呼百應，六名熱心男街坊與李先生一同將車抬起，成功將婦人被夾的右腳鬆出，期間亦有多名女街坊從旁協助。
李表示，雖然今次是他第二次車禍救人，但仍被婦人傷勢嚇到，「佢隻腳爛晒呀！我自己都仲未平靜到！真係好深刻！」亦有途人批評司機罔顧駕駛安全，幾乎「害死人」。