政情：新社聯上位瞄準選戰
社會急速政治化，地區嘅民生組織都有機會變成政黨，好似工聯會都變咗做政黨喇，教協又話諗緊變黨。港九新界原本都各有地區組織支持政府，喺港島各界聯合會、九龍社團聯會同新界社團聯會當中，由於新社團唔怕表態又大小通殺，政圈有人就估計，新社聯有望成為首個打正旗號參加各級選舉嘅社團。如果預言成真，新界東、西就會仲亂過依家嘞。
八十年代成立嘅新社聯一直支持政府依法施政，話佢係左派團體都不為過。早前元旦遊行，新界總商會捲入疑似派錢請人出席元旦遊行風波，連帶新社聯都畀人指控埋一份，搞到新社聯理事長陳勇頻頻出嚟接受訪問澄清「撲火」，講明事件同佢哋完全無關，不過更多嘅知名度增加係來自新社聯一直默默耕耘累積實力。有新社聯中人形容，新社聯近年積極做好「升呢」鋪墊工作，其中重要一環係打好同政府關係。
眾所周知，新界議題出名複雜多變，政府中人都知非長官意志就可以成事，所以有時都要借助地區人士掌握最新民情，事實上雙方默契建立之後就有來有往，新社聯有時都會自動請纓出席研討會表達意見，政府中人亦樂見有團體主動發聲，合作同互相幫助嘅基礎自不然慢慢形成，新社聯之後有需要邀請港府官員出席活動撐場，亦可以同政府有商有量。
新東新西「激上加激」
新社聯突圍而出嘅另一招數就係大小議題「通殺」，有新社聯中人總結番佢哋曾經表態嘅議題，基本上極少同民情民意脫節，當然呢個得力於新社聯有強大嘅地區網絡，加上去年底開始每周搞一次示威「保人氣」，呢個對新社聯打響招牌嘅名聲都有幫助。陳勇最近仲當選埋全國人大添。
喺去年嘅立法會選舉，新界東、西嘅戰情特別激烈，同票路嘅組織包括民建聯、工聯會、鄉事派、公民力量等配票嘅難度已經好高，參選人唔少其實都身兼新社聯成員，如果新社聯「獨立成團」，就更加會亂到不可收拾。
喺當下呢個時候，做咩事到最後講嘅都係實力，所以喺嚟緊呢幾年，唔好講咁多，大家做多啲實事先啦。