民主黨（白鴿黨）終於有樣嘢叻過民建聯（民記）？有網民喺網上討論區爆料，話白鴿黨何俊仁同葵青區議員尹兆堅將喺下周五舉辦中山珠海美食兩天團，每名成人團費係七百九十八元，呢次活動最吸引之處，係宣傳單張標明「繳交成人團費者即送十七吋內置高清彩色電視機乙部」，認真大手筆到冇人信。有網民即時留言寸爆被喻為「民記B隊」嘅白鴿黨，話該黨送禮仲叻過民記，另有網民提議要查下白鴿黨係咪借今次活動為某啲電器商「散貨」喎。白鴿黨平時鬧得對手多，今次真係現眼報喇！
