政情：勞資角力「蘇張」咪瞌眼瞓
港府近年多項政策疑向工商界「開刀」，先有最低工資，後有事在必行嘅男士侍產假，搞到工商界叫苦連天，據聞工商界已金睛火眼（目及）實未來多個被視為影響商界權益嘅戰場，首個上演嘅戰場可能係競爭事務委員會（競委會）。有工商界人士已表明會爭住加入競委會，同時會（目及）實標準工時嘅立法進度，預料勞工界亦毫不退讓，睇嚟商務及經濟發展局局長蘇錦樑（Greg蘇）同勞工及福利局局長張建宗（小肥張）要打醒十二分精神應付勞資雙方喇。
工商界爭相「卡位」
《競爭條例草案》去年六月通過後，Greg蘇表明會盡快成立競委會及審裁處，籌組時間至少要一年半載，原本呢個戰場有排都未殺到，但最近接連捱打嘅工商界都不敢怠慢，金睛火眼（目及）實競委會嘅組成，原因係法例賦予競委會嘅權力好大，一旦觸犯法例有關懲罰認真辣，有工商界表明避免到時任人魚肉，事前張揚會爆發「卡位戰」，換言之會極力爭取加入競委會霸位做好把關工作，Greg蘇認真要諗吓計仔點平衡各方利益同關注。
拉布 搞工運 各不退讓
此外，工商界同樣關注嘅仲有標準工時立法嘅漫長戰線，據聞港府最快會喺今年首季成立由五方人士組成嘅標準工時專責委員會。有工商界中人爆料，雖然有政府中人私底下保證標準工時立法喺未來兩年都難以成事，但有人形容依家成個討論儼如最低工資立法嘅翻版，一旦殺到埋身不排除要將行動升級，要求立法會嘅工商界代表「拉布」抗衡立法，估唔到工商界都要學泛民主派咁樣玩「拉布」。
不過，勞工界中人亦非省油的燈，有人提議倣效當年最低工資保障運動咁，推動標準工時保障運動，如果該運動成效不彰就要為標準工時立法喎，勞資雙方真係毫不退讓。話時話，勞資雙方嘅攻防戰可謂一觸即發，睇怕小肥張都要提早做好「摸底」工夫，否則一旦勞資雙方擦槍走火先嗌救命就太遲喇！