中環出更：戴德豐料接掌友好協進會
新年伊始，各大組織換屆熱潮又到。話說全國政協常委陳永棋、四洲集團主席戴德豐（Stephen）、陳有慶，尋日特意去撐裕華國貨老闆余國春搞嘅湖南名優產品展，身兼友好協進會會長嘅陳永棋爆料話，協進會將於三月底舉行會員大會推選新一屆會長，外界盛傳接班人係現任副會長嘅Stephen，陳永棋冇否認，仲加多幾分肉緊話：「當選機率係百分之九十九點九！」逗得Stephen笑容滿臉。
夠財力可壓場
陳永棋將於三月底交出友好協進會支火棒，仲勸上咗年紀嘅人，應該讓位畀後生一輩上位。傳聞好大機會接棒做會長嘅戴德豐，有傳話因為佢水頭充足，事關協進會經常舉辦大型活動，開支都好大吓，包括每年一度嘅人大及政協高爾夫球賽，加上該會嘅政協常委不少係商界大孖沙，所以冇番咁上下財力未必可以壓到場，所以戴德豐被指係不二之選。
卓妮