人民力量（人力）尋日舉行元旦遊行，參加嘅核心成員個個熟口熟面，但有個稀客突然同人力行得好埋，更一度企喺遊行隊頭博上鏡，講緊嘅係黃大仙區議員譚香文，佢仲着埋代表人力嘅黃色衫，夠晒同聲同氣。問佢係咪特登着黃色衫遊行，佢就話事有巧合，因為自己有好多黃色衫喎。不過，佢疑似向人力示好，表明認同人力理念，又話雙方保持良好關係。咁係咪會加入人力呢？譚香文就即刻將話題扯咗去講自己件衫嘅質地，莫非畀我哋講中佢嘅計劃？
