政情：同老婆遊吳哥窟 王國興聖誕「還債」
立法會議員平時開會冇時停，工聯會王國興就趁聖誕節及新年假期同太太去咗柬埔寨旅行過二人世界。興哥話，佢老婆一直心思思想去吳哥窟睇歷史古蹟，奈何佢要喺立法會「日以繼夜」開會，於是一直採取拖字訣兼扮傻唔記得。難得之前嘅聖誕假期平靜無嘢做，佢於是嗱嗱臨報團同老婆飛去河內同柬埔寨玩番幾日，滿足老婆心願。
興哥話，雖然參加旅行團有專車接送，但今次吳哥窟之行就行到冇時停，事關吳哥窟景區嘅範圍較大，最少要行成兩至三個鐘先可以睇晒所有景點。佢憶述，入到小吳哥城要攀爬鐵梯先可以去到城樓嘅中心高點，但王太就怕高唔敢爬上去，興哥惟有獨自爬上去睇風景，之後再會合老婆一齊欣賞吳哥窟嘅日落景色。
葉建源呻台灣逼人
教育界葉建源都喺假期同老婆去咗台北平溪嘅十分放天燈。葉建源話，暑假後一直冇時間去旅行，為免老婆大人詐型，佢專登帶老婆去台北同宜蘭玩番四日。但佢狂呻去到邊度都咁逼人，同香港嘅情況差唔多喎。