政情：謝偉銓吸票 唔嫌名長
立法會三十一個功能界別中，建築、測量及都市規劃界個名就最長兼繞口，有成十個字咁多。不過，該界別議員謝偉銓（Tony）似乎仲嫌個名未夠長，諗住要求政府喺個名度加入「園景」兩字。如果真係成功，呢個界別名稱字數破紀錄外，Tony亦可以回應園景師一直以來爭取「正名」嘅訴求，或者可以爭取到呢班一路被忽視嘅專業人士支持，間接鞏固佢喺界別嘅支持度。
該界別選民人數大約有六千七百幾人，根據立法會條例，有資格喺選舉中投票嘅除咗建築師、測量師及規劃師三個專業範疇外，亦包括園景師。Tony解釋，由於近年綠色生活抬頭，無論樓宇或者商場嘅布局都非常注重綠色空間，直接提升園景師嘅專業地位。佢話，今屆園景師選民人數較以前上升三百人外，更有唔少園景師同佢講，既然佢哋有份投票，界別名稱就應該順理成章加埋「園景」兩字。
若成功為連任鋪路
政制及內地事務局局長譚志源（Raymond）之前要求功能組別嘅建制派議員，諗計擴大功能界別投票人數，力保建制派喺呢啲界別嘅影響力。喺建築、測量及都市規劃界中，雖然泛民主派嘅公共專業聯盟吳永輝自○○年至今三度挑戰呢個界別嘅建制派議員失敗，但今屆竟然攞一千四百票，僅以二百零四票落敗，下屆大有機會捲土重來。如果Tony可以成功吸納到園景師呢個大票倉，下屆成功連任嘅機會就會大增，亦間接幫咗Raymond一把。
Tony話，現時其界別已經有十個字，如果再加埋「園景」兩個字，就破紀錄有成十二個字。雖然中文對佢嚟講都唔算難記，但英文嘅Architectural, Surveying, Planning and Landscaping就極有難度，可能要諗啲縮寫方便其他人記得。至於「園景」兩字應該擺喺邊度先合乎眾人心水，Tony就笑笑口話應該由政府去諗喎。